Folión de Carros
 |
|
Carroza do Folión dos anos 30 |
|
É digno de destacar Folión de Carros. Aparece enmarcado na celebración das festas patronais da vila (o Sábado das mesmas), esta data correspóndese co cuarto fin de semana do mes de Agosto.
Estamos diante dunha mostra de etnografía popular da que os seus orixes se poden remontar á Idade Media. Tan só por un día, os gremios abandonaban o seu tradicional illamento para facer como unha especie de manifestación conxunta onde se podían ollar a multitude de oficios que circundaban por aqueles tempos o noso concello. Non se deixou de celebrar tódolos anos a excepción daqueles que abrangueu a Guerra Civil; foi restituída no ano de 1949 polo entón alcalde Luís Campo Fernández.
 |
|
Folión de carros na actualidade |
|
Un dos actores importantes neste acto son as xugadas de bois e vacas que terman e empurran unhas carrozas que percorren as diversas rúas da vila; sobre as mesmas represéntanse diversos oficios moi populares na nosa comarca noutros tempos. Muiñeiros, zoqueiros, carpinteiros, etc., son algúns dos oficios retratados. Amais disto, tamén son escenificadas diversas labores agrícolas de fonda presenza en Chantada e con orixes que se remontan a tempos pretéritos da historia: a vendima, a seitura, a malla,... O folión de carros ven a representar a cultura popular destas terras que é unha mestura de diversos elementos: humor, respecto, tradición, nostalxia, etc. A súa importancia foi recoñecida en Maio do ano 2002 cando a Xunta de Galicia a declarou Festa de Interese Turístico.
