O denominado Camiño Sur provén de terras leonesas para internarse na nosa Comunidade Autónoma por Montefurado e, seguindo o leito do Sil, achegarnos a Quiroga e Pobra de Brollón. A partir de aquí, o ramal do sur levaríanos a terras de Chantada. A 5ª etapa, de Belesar ó Monte Faro, discorre ó longo de 16,7 Kms. polo concello chantadino. Ponte Ermida, Follatal, Queixeiros, Alemparte, casco urbano de Chantada, Centulle, Asma, Lucenza, Vilaseco, Penasillás e Monte Faro son as paradas obrigatorias dun percorrido cheo de suaves pendentes, desde as que se contemplan paisaxes de gran beleza natural.

Pequena ruta de 5,5 quilómetros para realizar a pé ou en bicicleta. Saíndo de Chantada pola estrada C-533 con dirección a Monforte e seguindo o leito do rio Asma atopámonos a 4 quilómetros con Tarrío. Dende alí, pola dereita, e por un camiño en pendente rodeado de viñedos e soutos poderemos observar os restos da antiga calzada romana que conduce a Belesar. Dende Os Queixeiros, por unha estrada secundaria, chegaremos a Líncora, onde poderemos deternos para admirar a igrexa románica de San Pedro. A noso ruta está chegando ó final; así unha desviación á esquerda levaranos a Camporramiro, para regresar novamente ó punto de orixe.

Distancia: 5,5 Km.
Duración aprox. ida e volta:
2h. a pé e 1h. en bicicleta
Ruta Realizada por:
Clube de Montañismo de Chantada

Partindo do peto de ánimas de Centulle (San Xurxo de Asma), viaxamos pola estrada de Antas de Ulla ata o Lugar de Fornas, onde nun penedo a man dereita atopamos as sepulturas antropomorfas de Fornas (San Cristovo de Fornas).
Seguindo a mesma estrada cruzaremos os lugares de Outeiro e Casteda para Chegar a Mouriscados onde veremos un manancial de  da augas medicinais que nacen no monte e que foron empregadas no balneario que poderemos ver desviándonos por un camiño a dereita.
Dende Os Catro Camiños lugar da freguesía  de Sta. Mª de Arcos encrucillada entre esta mesma,Taboada, Chantada, Antas de Ulla, desviámonos polo camiño que se dirixe a este último onde nos atopamos co pazo da Elfe, volver a Os catro camiños para despois dirixirnos cara Arcos onde o escudo do vello pazo de Suatorre e a Torre de Arcos nos lembran historias irmandiñas.
Para volver o noso punto de partida farémolo desprazándonos ó Lugar de San Paio de Muradelle onde atopamos a igrexa parroquial, románica na cal destaca fundamentalmente o seu tímpano. Seguidamente dirixímonos a Mariz, na estrada que vai dende o lugar de Vigo á Igrexa de Mariz, á man esquerda podemos divisar unha mámoa (Coto da Medorra).
Finalmente rematamos a nosa viaxe, volvendo a Centulle por sendeiros e estrada dende o lugar de O Pacio.

Ruta Realizada por:
A Charca Eco-Turismo

Dende a explanada de Tarrío, cóllese un sendeiro que, cruzando o río Asma uns centos de metros antes da súa desembocadura no Miño, combina un tramo inicial baixo un fermoso e húmido bosque, co resto do percorrido a media ladeira, entre viñedos, e rodeando o monte de San Pedro. As panorámicas da ribeira entre San Fiz e Belesar son excepcionais.

Duración aprox. ida e volta: 2 h.
Ruta Realizada por:
Clube de Montañismo de Chantada

Dende a estrada que conduce ata a aldea de Marce no veciño concello de do Saviñao baixa un sendeiro no que o tramo inicial é bastante suave, aínda que a medida que nos introducimos na vaguada do Rego de Aguianza, o trazado vaise empinando. O treito final é un pouco abrupto, aínda que axudados por sogas, poderemos chegar xusto ó pé dunha espectacular fervenza nunha paraxe cunha humidade que aliviará o noso esforzo de vires e reconfortaranos para o esforzo de volver.

Duración aprox. ida e volta: 2,5 h.
Ruta Realizada por:
Clube de Montañismo de Chantada

Nos meses de verán pódese percorrer a Ribeira Sacra do Sil e do Miño en catamarán polos encoros de Belesar e Os Peares no río Miño e o de Santo Estevo no río Sil. Con este itinerario ademais de apreciar a espectacular paisaxe destas ribeiras, poderemos admirar monumentos histórico-artísticos de gran interese como a igrexa de Sto. Estevo de Chouzán ou a de Sto. Estevo de Atán.