A Feira do Viño de Chantada naceu no ano 1983, no que se celebrou a súa primeira edición, respondendo ó espírito de cambio que xurdiu no sector vitivinícola do sur da provincia de Lugo. Inaugúrase o 12 de Marzo do citado ano coa presenza de diversas autoridades. Acoden ó evento o chantadino Carlos Gilberto Otero Díaz, por aqueles tempos conselleiro de Facenda da Xunta de Galicia. O encargado da lectura do pregón foi o ilustre catedrático e director do Museo do Pobo Galego don Antón Fraguas Fraguas. Segundo datos da época, o número de persoas que se achegaron ate a Feira roldou as das dez mil.

Antón Fraguas Fraguas foi o pregoeiro da 1ª Feira do Viño de Chantada

Despois duns primeiros anos de incerteza sobre o seu futuro, aséntase como unha das feiras máis importantes da provincia, ata que na última metade da década dos anos noventa, xorde o seu despegue definitivo e convértese na Feira do Viño máis importante de todo o noroeste peninsular.
Nesta Feira, conxúgase de maneira tradicional o espírito das festas dos nosos antepasados coas máis modernas técnicas de elaboración e venda aplicables a este sector que nos últimos anos sofre un despegue non visto en ningunha outra zona de produción vitivinícola.