A primeira edición da Feira do Viño de Chantada celébrase o 12 de marzo de 1983. Xorde como resposta ao espírito de cambio que sofre o sector vinícola do sur da provincia de Lugo. O encargado de dar lectura ao pregón foi o catedrático e director do Museo do Pobo Galego don Antón Fraguas Fraguas.

Tralos primeiros anos aséntase como unha das feiras máis importantes da provincia. A finais dos anos noventa alcanza o despegue definitivo, impulsado pola creación da D. O. Ribeira Sacra.

Mantense na actualidade como a festa vinícola máis temperá do ano, atraendo a un gran número de persoas para degustar os caldos das adegas da zona.

Dentro da súa programación inclúense habitualmente catas comentadas, estands das adegas participantes e actuacións musicais (charangas, pasacalles, orquestras e grupos tradicionais).