O Entroido Ribeirao é un dos entroidos máis antigos de Europa. O seu nome, ribeirao, provén da zona de ribeira onde aínda se festexa. En concreto, na parroquia de Santiago da Riba.

Celébrase en catro xornadas: domingo lambedoiro, domingo corredoiro, domingo de entroido e martes de entroido. Durante o seu transcurso recréase a escena do cobro das rendas señoriais, onde participan os Volantes (=señores), os Peliqueiros ou Maragatos (=gardiáns) e os Mecos (representan os oficios).

Os Peliqueiros abren paso coas súas correas aos Volantes, os cales portan na cabeza os puchos de grandes dimensións, decorados con vistosas flores e cintas de cores, denominadas colonias. Visten traxe amarelo e vermello e un cinto repleto de campaíñas do gando. Os Peliqueiros cóbrense con pelicas e farrapos, mentres zoscan a quen moleste aos Volantes. Finalmente, os Mecos encárganse de representar escenas satíricas sobre os oficios e roles sociais.

Foi declarada Festa de Interese Turístico en 2002 e Ben de Interese Cultural en 2018.

Integrada no calendario das Festas Patronais de Chantada, é unha das exaltacións etnográficas máis destacadas da Península Ibérica.

O Folión de Carros é unha celebración de orixe descoñecida na que diferentes pandillas representan escenas antigas ligadas coa cultura da comarca de Chantada: traballos agrícolas (malla, sementeira, fiadeiro, etc.), oficios e labores relacionados coa transformación de todo tipo de materia (panadeiros, canteiros, carpinteiros, ferreiros, etc.), celebracións festivas (baile da vela, romaría do San Lucas, romaría do Faro, etc.), actividades comerciais e produtivas tradicionais (feiras, fábricas, locais de envasado, cafés, etc.), ou varias destas en conxunto.

As pandillas crean elas mesmas as estruturas sobre soportes móbiles (carros tradicionais ou plataformas de ferro) que despois desfilan polas rúas de Chantada, tiradas por unha xugada de vacas ou bois, a noite do Folión nun ambiente marcadamente festivo.