Tras pasar unha área de descanso, un desvío condúcenos ata a ponte de San Fiz, nun percorrido sinuoso onde o viñedo é o protagonista. Tras cruzar a ponte, desviámonos á dereita para continuar cara á aldea de Belesar.

Desde este lugar poderemos realizar unha ruta fluvial, polo río Miño, no encoro dos Peares.

Continuamos en dirección á ponte de Belesar que deberemos cruzar. Unha vez na outra beira, temos a posibilidade de realizar a Ruta dos Viñedos de Belesar PRG-183 ou percorrer parte do Camiño de Inverno, a través da calzada romana dos Codos de Belesar.

Se optamos por regresar á vila de Chantada, podemos continuar pola estrada LU-P-1804 realizando a ruta Belesar por LU-P-1801 en sentido oposto. De camiño, atópase o miradoiro de Líncora.