Os días 5 e 21 de cada mes en Chantada celébranse a feira tradicional.

Neses días un mercado ambulante ocupa as rúas de da vila, principalmente a Avenida Xoán XIII, a rúa Formoso Lamas e a Alameda Costa Clavell rematando no Mercado Gandeiro.

O Mercado Gandeiro dispón de varios pavillóns e edificios dedicados á exposición e venda de gando, ademais de maquinaria e outros produtos relacionados coa agricultura e a gandería.

Acolle tamén un pavillón cuberto onde se pode mercar o polbo á feira acompañado de pan e viño, para consumilo nas propias instalacións ou para levar.

A praza de abastos de Chantada atópase en pleno centro urbano. Nos seus arredores atopamos bares, supermercados, panaderías, droguerías e diferentes tendas, polo que é unha zona moi transitada.

No seu interior pódense atopar produtos frescos de alimentación como carnes, pescados e mariscos.

O mercado inaugúrase o 8 de xaneiro de 1956, sendo alcalde José Joaquín Yebra-Pimentel. Deseñado polos arquitectos Luis Pérez Barja e José Álvarez Ude Aguirre, o edificio presenta unha planta rectangular, de catorce metros de ancho por vinte e catro de profundidade, e dous pisos.