A lectura fíxose antes do pregón da Feira do Viño
Este domingo, 8 de marzo, ás 12:45h; previo á lectura do pregón da 43 Feira do Viño de Chantada, a concelleira de Igualdade, Pamela Fernández, leu no palco central da Feira o manifesto do Día Internacional da Muller.
MANIFESTO 8 DE MARZO DE 2026
A conmemoración do 8 de marzo, Día Internacional das Mulleres, permítenos lembrar, reivindicar e facer balance dos avances acadados. Neste 2026 a ONU, une a mulleres e nenas para esixir igualdade real de dereitos e unha xustiza para facer valer, exercer e gozar deses dereitos. Hoxe é un día para homenaxear ás mulleres que ao longo da historia foron fundamentais para alcanzar a igualdade
- Mulleres como Olympe de Gouges, autora da Daclaración dos Dereitos da Muller e da Cidadanía. Simone de Beauvoir, filósofa autora de “El segundo sexo”, obra fundamental para o feminismo moderno. Concepción Arenal, pioneira na loita pola igualdade, Clara Campoamor, impulsora do sufraxio feminino en España, Emilia Pardo Bazán que logrou ser admitida no prestixioso Ateneo madrileño en 1905.
- Mulleres que dende os espazos de responsabiladade, no seu traballo cotiá, son chave para a xestión económica, planificación de servizos, a contratación pública ou programando e prestando servizos á comunidade. Un traballo constante e rigoroso, esencial para garantir a eficacia das políticas públicas; e para que a igualdade estea presente en todas as tomas de decisións.
- Mulleres, que non son coñecidas, que non ocupan ningún posto de responsbilidade, que non están no foco mediático; pero que no seu día a día loitan para ter unha corresponsabilidade nos coidados, mulleres que educan ás súas fillas e fillos en igualdade, que empoderan ás nosas mozas, que serán as mulleres do futuro.
- Mulleres que reúnen a valentía para denunciar a violencia de xénero, violencia que sufrimos só polo feito de ser mulleres. Temos que alzar a voz ante todos os casos de violencia que estamos coñecendo en todos os ámbitos da sociedade, e que nos demostra que a violencia de xénero é algo estrutural.
A todas estas mulleres dicímoslles: XUNTAS, UNIDAS, NIN UN PASO ATRÁS. O Concello de Chantada este 8M:
- Reafirma o seu compromiso coa igualdade entre mulleres e homes e a loita contra os movementos antixénero, que poñen en risco os avances acadados.
- Reitera a súa condena a calquera forma de violencia contra as mulleres, así como o apoio ás vítimas, impulsando accións de prevención, sensibilización, atención e coordinación dende o ámbito local.
- Comprométese a integrar de maneira transversal o principio de igualdade en todas as políticas locais, reforzando a eficacia, a transparencia e a responsabilidade das actuacións públicas.
- A reivindicar a necesidade de dotar ás entidades locais de financiación suficiente, estable e finalista para o desenvolvemento das políticas de igualdade, prevención da violencia e atención integral das vítimas.
- A denunciar o negacionismo da desigualdade e da violencia machista, e reafirmar o rexeitamento frontal á violencia estrutural que padecen as mulleres.
