O Alcalde de Chantada Manuel Lorenzo Varela destaca o traballo desenvolto e agradece a boa disposición da Xunta
O Concello de Chantada acolleu este xoves unha nova mesa de traballo para abordar a ampliación do servizo de hospitalización a domicilio (HADO) do Hospital Comarcal de Monforte.
Participaron do encontro o Conselleiro de Sanidade, Antonio Gómez, o xerente da área sanitaria, Ramón Ares, o alcalde do Concello de Chantada, Manuel Lorenzo Varela, o alcalde do Concello de Carballedo, Julio Yebra Pimentel, e as concelleiras destas áreas nos dous concellos.
A HADO presta atención sanitaria a domicilio, posibilitando que os ingresos hospitalarios diminúan a súa duración e que o paciente poida terminar de recuperarse na comodidade da súa casa. Desde o 2016 o Hospital de Monforte dispón deste servizo, que é atendido por unha médica e tres enfermeiras, chegando aos concellos de Monforte de Lemos, Bóveda, Pantón, O Saviñao, Sober e A Pobra do Brollón. Ata agora non entraban na área de cobertura da HADO, os concellos de Chantada e Carballedo.
O alcalde de Chantada, Manuel Lorenzo Varela, destaca o traballo que se leva desenvolto para acabar cunha situación que perxudica aos concellos de Chantada e Carballedo e agradece a boa disposición amosada pola Xunta, “Levamos tempo traballando nisto e coincidimos na necesidade de implantar a HADO nos concellos de Chantada e Carballedo. No baremo distancia-tempo quedabamos fóra da zona de cobertura do Hospital de Monforte, pero estamos en boa sintonía coa Consellería para poder ampliar o servizo. Agora hai que solucionar un dos principais problemas que é a falta de medios humanos, téntase facelo no menor tempo posible”.
