As inscricións deben facerse no Rexistro do Concello ata o 10 de febreiro
O Concello de Chantada, co obxectivo de promocionar e conservar as tradicións vinculadas co Entroido, organiza o Desfile de Comparsas que se celebrará o sábado, 14 de febreiro; ademais de colaborar tamén co Entroido Ribeirao, de especial interese polo seu carácter etnográfico e que comeza as celebracións o día 1 de febreiro. O Desfile de Comparsas ao que o concello destina 6.000€, 5.000€ en premios e 1.000 € en axudas, comezará ás 18:00h na Avda de Lugo, á altura da DomusVi para rematar na Praza de Galicia onde a actuación da orquestra La Travesía porá o punto e final á celebración.
As bases do Concurso do Desfile de Comparsas do Entroido 2026 pódense consultar neste enlace. Para participar recóllense dúas categorías: Comparsas Adultos para aqueles grupos formados por máis de 15 persoas e Comparsas Infantil, grupos de máis de 15 persoas formados integramente por menores de 14 anos, ou que máis dun 70 % dos seus membros sexan menores desta idade. Nas dúas categorías establécense os seguintes premios:
- 1º Premio: 700,00 €
- 2º Premio: 500,00 €
- 3º Premio: 300,00 €
Por segundo ano inclúense premios de carácter local, que serán compatibles cos anteriores e que repartirán as seguintes cantidades tanto nas Comparsas de adultos locais como nas de infantil locais:
- 1º Premio: 500,00 €
- 2º Premio: 300,00 €
- 3º Premio: 200,00 €
Para incentivar a participación entregaranse 100,00€ a cada comparsa de máis de 15 integrantes. Esta axuda daráselle a un máximo de 10 comparsas, de superar esta cantidade priorizarase a orde de inscrición.
As persoas e grupos interesados en participar deben inscribirse no Rexistro do Concello desde este xoves, 22 de xaneiro, e ata o 10 de febreiro tal como se recolle no BOP deste 21 de xaneiro, presentando:
- Solicitude asinada polo participante ou representante legal
- Fotocopia do DNI do solicitante e no seu caso do CIF
Para máis información poden dirixirse á Casa da Cultura de Chantada no teléfono 982441752. O xoves, día 12 de febreiro, ás 20:00h celebrarase unha reunión de obrigada asistencia na Casa da Cultura na que participará un representante de cada comparsa. Aportarase ademais o audio, de non máis de 3 minutos, que se reproducirá durante o desfile. Esta xuntanza servirá para aclarar dúbidas e precisar o lugar que cada quen ocupará no desfile.
As bases establecen tamén unha duración máxima de 3 minutos para as representacións das comparsas diante do palco ante o xurado, que valorará de 1 a 10 cuestións como o vestiario e orixinalidade dos disfraces, a posta en escena durante o desfile, a simpatía e a gracia dos participantes, a orixinalidade da carroza ou plataforma, o título da comparsa ou grupo e esta actuación final.
