O domingo ás 12:45h lerase o Manifesto no palco da Feira do Viño
O Concello de Chantada, a través do Centro de Información á Muller, está a desenvolver a programación para celebrar o 8M, Día Internacional da Muller. A primeira proposta de actividades celebrábase este venres aproveitando os contacontos de comezo de mes na Biblioteca Municipal de Chantada.
Con motivo do 8M a proposta de contacontos para o público infantil e familiar foi “Somos iguais na maxia”, un espectáculo no que a maxia, o humor e a interacción co público foron os grandes protagonistas. A función achegouse á loita pola igualdade e á prevención da violencia de xénero, empregando a maxia como ferramenta de coeducación. Abordáronse temas como a fenda salarial, os estereotipos ou o papel das mulleres na historia e no mundo laboral.
Xa na xornada do domingo, día 8, a concelleira de Igualdade, Pamela Fernández, lerá o manifesto. Será ás 12:45h no palco central da 43 Feira do Viño de Chantada que este venres comeza na vila do Asma. A lectura do manifesto farase antes do pregón e da entrega de premios aos mellores viños desta edición.
A seguinte cita da programación do 8M en Chantada será o venres, 13 de marzo ás 19:00h na Casa da Cultura coa presentación do IV Plan de Igualdade, unha ferramenta de planificación e coordinación transversal, concibida para orientar as políticas públicas municipais cara a un modelo de convivencia baseado no respecto, na corresponsabilidade e na equidade. A maiores neste mes comezan os obradoiros de educación afectivo sexual nos centros de educación secundaria.
