“Espazo sen fume” en Chantada
O Concello de Chantada e a Asociación Española contra o Cancro en Lugo a través dos seus respectivos representantes, Manuel Lorenzo Varela como alcalde e María Luz Abella García como presidenta, veñen de asinar un acordo para desenvolver no concello o proxecto “Espazos sen fume”, que promove a Asociación Española contra o Cancro. O convenio terá unha vixencia de dous anos prorrogables por períodos anuais.
Esta proposta da Asociación Española Contra o Cancro promove a creación de ambientes libres da exposición ao fume nocivo do tabaco tradicional e/ou electrónico, en espazos abertos de uso público e colectivo. Co obxetivo de xerar entornos saudables para protexer a nosa saúde e previr enfermedades, como o cancro.
Coa sinatura do convenio, o Concello de Chantada colaborará na difusión da campaña de prevención visibilizando a condición de “Espazos sen Fume” dos establecementos ou instalacións públicas. Así o primeiro Espazo Sen Fume que se vén de sinalizar é a zona do Campo Municipal de Fútbol do Sangoñedo. Un cartel nas instalacións recolle:
En marcha para frear o cancro
Iniciativas saudables para previr o cancro
Respiro libre neste lugar
O Concello de Chantada comprométese así a difundir as mensaxes de prevención da Asociación Española Contra o Cancro e a promover a normativa e ordenanza necesaria para a prohibición de fumar nas súas instalacións exteriores, sendo este o obxecto principal da colaboración.
Pola súa banda a Asociación Española Contra o Cancro, comprométese a facilitar recursos e ferramentas destinados a sinalizar que ditas instalacións son “ESPAZOS SEN FUME”, así como formación, divulgación de prevención do tabaquismo, servizos para deixar de fumar, entre outros.
A Asociación Española contra o Cancro ten como obxetivo conseguir un 70% de supervivencia en cancro no ano 2030. Para alcanzar este obxetivo é fundamental:
- Apoiar a investigación oncolóxica poñendo o foco en proxectos que poidan ter unha translación a clínica mais rápida, así como seguir investigando en tratamentos para aqueles cancros que teñen unha taxa de supervivencia baixa.
- Incentivar accións de prevención destinadas a impulsar hábitos de vida saudables. Incrementar e fomentar os programas de detección precoz de cancro e garantir o acceso equitativo a estes programas, sobre todo nos cribados de colon, pulmón e cérvix.
- Atender e apoiar aos enfermos e as súas familias ao longo de todo o proceso e facilitándolles apoio psicolóxico, atención social e asesoramento especializado.
