“Quero que se o proxecto se materializa, o pobo de Chantada poida percibir melloras”
En xullo deste ano, os concellos de Boborás, O Carballiño, O Irixo, Leiro, Ribadavia San Cristovo de Cea, Beariz e Chantada asinaron un convenio coa compañía enerxética Driza Green Partners, concesionaria dos parques eólicos de Agratrina, Agromaces, Sistesas, Ventoburgo e Xestiloi, actualmente en fase de desenvolvemento.
Con estes convenios a empresa promotora asegura que pretende crear vínculos duradeiros co territorio e garantir actuacións de interese público que beneficien ás comunidades locais, destinando voluntariamente o 2,5% dos beneficios xerados.
“O convenio é unha iniciativa da empresa promotora, que decide entregar parte dos seus beneficios pola produción de enerxía eólica aos territorios en forma de mellora de espazos públicos, conservación do patrimonio, propostas culturais,… Os concellos onde están proxectados parques, poden asinalo ou non, os parques vanse facer ou non independentemente deste acordo”, asegura o alcalde de Chantada, Manuel Lorenzo Varela. O rexedor resposta así ás críticas de Por Chantada, “acusándoo de hipotecar o futuro do Concello”.
“A concesión dos parques eólicos a esta empresa foi aprobada polo goberno do Estado como actuación de interese público, estivo a exposición pública e agora falta a diapositiva. Todo está en tramitación e aínda podería pararse. O acordo asinado polos concellos é independente deste proceso, só garantiría que se se fan os parques, se poidan beneficiar de melloras sociais nos seus territorios”, explica o alcalde.
O convenio recolle como unha das prioridades, programas de eficiencia enerxética en edificios públicos e establece mecanismos de seguimento conxuntos entre concellos e empresa para garantir a transparencia e efectividade das iniciativas que se desenvolvan.
“En caso de executarse o parque, o concello recibiría ingresos principalmente polas licenzas e polo ICIO. Co convenio recibiriamos tamén beneficios sociais, pero para iso o proxecto tería que estar rematado e aínda está pendente de trámites que o poden parar”, afirma o alcalde.
Lorenzo Varela lembra que como rexedor ten delegacións para asinar este tipo de convenios, “Non se fixo nada a escondidas, seguiuse un procedemento normal, con todo absolutamente legal. Non é un convenio para facer o parque, iso non depende do Concello. É un convenio, para se se fai o parque ter os beneficios que ofrece a empresa. Quero que se o proxecto se materializa, o pobo de Chantada poida percibir melloras”.
