Previamente fixéronse melloras de accesibilidade
O Concello de Chantada a través da concellaría de Infraestruturas Urbanas coordina o comezo do programa para a limpeza de beirarrúas e prazas na vila do Asma. Previamente a estas actuacións, a brigada de obras e servizos levou a cabo rebaixes e adecuación das beirarrúas para mellorar a accesibilidade en varias zonas.
Despois destas obras de mellora da accesibilidade, que se seguirán executando progresivamente noutras beirarrúas, decidiuse actuar na limpeza dos pavimentos, “Esta era unha medida que había que levar a cabo. O pasado ano desde o concello adquirimos unha máquina hidrolavadora con varios tipos de lanzas e un plato fregador o que permite aos operarios mellorar a limpeza nas unións cos edificios, usar presión nos bordos e poder lavar as beirarrúas tanto de baldosa como de pedra”, explica o alcalde do concello de Chantada, Manuel Lorenzo Varela.
Os traballos de limpeza comezaron na contorna da Praza de Santa Ana pola Avda de Ourense e continuarán durante os próximos tres meses para chegar a todas as zonas peatonais da vila. Tamén se limpará todo o mobiliario de pedra das diferentes prazas e espazos verdes.
