As obras mellorarán o tráfico e a seguridade peonil da zona
O Concello de Chantada executa coa brigada de Parques e Xardíns o adecentamento do espazo comprendido entre as rúas Emilia Pardo Bazán e Ribeira Sacra. As actuacións desenvólvense en varias fases, de modo que na primeira que se executa acondicionouse o terreo coa retirada de materiais e o desbroce de maleza.
Actúase nunha superficie de 1000m2, na parte baixa da zona, “esta obra permite desatascar o embude que había na rúa Ribeira Sacra. Posteriormente actuarase na parte alta, creando unha mellora nos accesos aos edificios e completando unha gran área de 2000 m2”, explica o alcalde do Concello de Chantada, Manuel Lorenzo Varela.
A obra contempla a pavimentación da rúa Ribeira Sacra con mestura asfáltica en quente e a contrución da beirarrúa que enlaza ambas as rúas; farase o pintado das prazas de estacionamento e instalación de sinalizacións. Unha vez rematado o desbroce comezarase cos traballos para conectar a beirarrúa da marxe dereita de Ribeira Sacra, “o que mellorará de xeito significativo a seguridade entre Ribeira Sacra e Pardo Bazán”.
O rexedor destaca a importancia desta obra que ademais de mellorar o tráfico e a seguridade, permitirá aproveitar este espazo como gran zona verde na que se instalarán pérgolas e todo o mobiliario urbano necesario, ademais de plantar especies autóctonas e crear outras dotacións para conseguir un gran espazo para desfrute de familias e veciñanza.
