O Concello de Chantada conta con 5 miradoiros no termo municipal
O concello de Chantada vén de rematar a mellora e modernización do miradoiro Sobre Cabo do Mundo localizado en Nogueira de Miño. Este enclave ofrece unha espectacular panorámica da zona de ribeira sobre este icónico espazo no territorio Ribeira Sacra.
A brigada de parques e xardíns acondicionou este miradoiro cambiando as estruturas de madeira e instalando novas varandas máis seguras e acordes coa contorna. O persoal de parques e xardíns desenvolve ademais durante todo o ano labores de desbroce e mantemento nos miradoiros para a súa conservación.
O Concello de Chantada conta con cinco miradoiros no seu termo municipal, 4 deles sobre o río Miño e un no monte do Faro nun espazo natural integrado na Rede Natura 2000, declarado Lugar de Importancia Comunitaria e espazo Starlight.
Con vistas ao Miño dispón dos miradoiros Terra Branca, Líncora, Sobre Cabo do Mundo e Sernande. Nestes dous últimos, a concellaría de Turismo fixo un importante investimento para mellorar as instalacións que cada ano reciben máis visitantes.
No ánimo de seguir avanzando na calidade deste tipo de recursos, a concellaría de Turismo de Chantada prepara a reforma integral do miradoiro de Líncora.
