A Asociación Stop Suicidio Galicia promoveu a proxección do documental “El estigma del silencio”
O Auditorio Municipal de Chantada acollía este domingo a proxección do documental, “El estigma del silencio” nun acto promovido pola Asociación Stop Suicidio Galicia que contou coa colaboración do Concello de Chantada para visibilizar e poñer voz a un tema marxinado e silenciado pola sociedade, o suicidio.
A película presentou testemuños, experiencias reais de sobreviventes, familiares e expertos no campo da psiquiatría e a psicoloxía do suicidio e a saúde mental. Despois da proxección tempo para o debate que estivo guiado por Miguel Vázquez Penas, presidente de Stop Suicidios Galicia e veciño de Chantada, que explicou o traballo que desenvolve a asociación que comezou a andar hai 5 anos co obxectivo de axudar ás persoas con pensamentos de suicidio, “A asociación pretende axudar ante a carencia de especialistas, psiquiatras e psicólogos que non teñen o tempo suficiente para poder atenderte. O suicidio é multifactorial e debe tratarse cun equipo multidisciplinar, facendo terapias moi específicas. Queremos dar a axuda que non recibimos. Estas situacións existen e non se poden seguir silenciando”.
En España suicídase unha persoa cada dúas horas e Lugo é a provincia na que máis xente se suicida. A soidade, a falta de atención ou os patróns de conducta establecidos pola sociedade que se fan cada vez máis inasumibles están na orixe deste tipo de situacións. Por que temos medo a falar de algo que está tan próximo nas nosas vidas e o seguimos tratando como estigma ou tabú. Esta foi a base do encontro no que se destacou a atención infantoxuvenil que fai a asociación atendendo cada vez máis a pais e nais que non saben a onde recorrer cos seus fillos e fillas. Explica Miguel Vázquez que, “se a todo engadimos a presión das redes sociais as persoas poden quebrar. Temos que vivir como persoas e non como o noso avatar, agora hai anuncios de como tes que ser, as redes dánche filtros para mellorar a túa foto e agora a IA colócache de fondo a imaxe do coche de moda. Non sei ata que punto estamos levando unha arma na man co teléfono móbil”.
Pamela Fernández, concelleira de Igualdade e Saúde Pública, destacaba a participación da xente na actividade e insistía na necesidade de acabar con estigmas ao respecto do suicidio, “Segue habendo cuestións tabús ao redor do suicidio, por iso son importantes actividades como esta de divulgación e sensibilización. Chamadas de atención para acabar coa falta de atención social a estas problemáticas”.
